李施嬅見財化水！拉頭馬後晒彩票 塡錯飛懵然不知

02754566

今個馬季快活谷煞科戰最後一場賽事(第九場)，已於本周三晚(7月6日)上演，結果由冷馬「順勢寶」食尾糊，鞍上騎師何澤堯計埋同晚第二場爆冷贏吳定強馬房之「原始寶石」在內，全晚起個冷孖，而靚女藝人李施嬅更有拉頭馬。
第九場三班1200米，三歲愛爾蘭自購馬「順勢寶」由賀賢訓練，上仗初出217倍大冷後上第四，幕後見好唔收，趕喺谷草煞科前再出，今場早段墮後走勢一般，末段卻從內欄左穿右插下後發先至，這匹表現充滿鬥心的灰馬，第二次在港出賽便以頸位之先開齋，單Win及組合獨贏A2分別派103.5及27.5元。
李施嬅到場為「順勢寶」馬主馬浚豪等友人打氣，結果齊齊拉頭馬，李施嬅賽後更主動向記者大晒彩票，笑得好開心，但原來她投注了第八場8號馬80蚊Win，不過「順勢寶」卻是第九場8號馬，李施嬅疑似買錯場次，而第八場8號馬是「亞馬寶寶」(跑第二)，李施嬅本應扣本後贏748元，如今反輸80元，來回冇咗828元。
今場二至四名則順序為「中華寶貝」、「超好玩」及「陀飛輪」，四重彩派一萬五千蚊多啲。另外，這晚騎師王由雷神勝出，佢第九場座騎「舖舖旺」閘前被競賽小組按獸醫意見着令退出，尾場冇份跑只做觀眾。                                                                               

	李施嬅為第九場8號馬順勢寶打氣，拉頭馬後晒彩票，卻是投注了第八場8號馬亞馬寶寶，疑似買錯場次見財化水
順勢寶(最內檔)