[新聞] 利物浦化悲憤爆廠

今晚英超重頭戲，阿仙奴主場難勝利物浦。自失落英聯盃後，兵工廠跌晒Watt，歐聯、英足盃接連出局，聯賽亦難追曼聯，一眾小將不擅踢「逆境波」，威力大大減弱。紅軍安祖卡路爾同蘇亞雷斯愈夾愈熟，陣中亦新人輩出，球隊運數明顯正在冒升！

                        阿仙奴連番受挫未回魂

阿仙奴領隊雲格鍾意「湊細路」，班小將波底係好，踢順境波時水銀瀉地，但佢哋心理質素曳，一遇逆境波就踢到走晒樣，歸根究柢，與陣中缺少經驗領袖有直接關係。爆大冷痛失英聯盃後，兵工廠就心神恍惚，之後接連受巴塞隆拿同曼聯痛擊，成班波更頭耷耷眼濕濕，曾經五仗不勝，上場若非黑池把握力曳，兵工廠贏唔贏到都成問題。今仗雖有施捷斯尼復出把關，佐羅、桑治、丹尼遜亦可落場，但隊長法比加斯、禾確特、拿斯尼等都不在最佳狀態，前線只有尹佩斯交到貨，對住紅軍冇贏波把握。

                        紅軍士氣盛「安蘇配」夠殺

利物浦季尾雖有隊長謝拉特、中堅丹尼爾艾格受傷提早收咧，而格連莊臣、馬田基利今場亦缺陣，但反而造就新人上位，中場史比寧夠淡定，而上仗鬥曼城，十八歲右閘法拿根更一鳴驚人，加上安祖卡路爾又梅開二度，利好消息一個接一個，球隊士氣極佳。

雖然紅軍作客係弱項，但球隊鬥勁旅必然踢高兩皮波，於杜格利殊麾下，殘陣紅軍去到奧脫福都係僅輸曼聯一粒，作客史丹福橋更擊敗車路士。紅軍遇強愈強，加上前線「安蘇配」威力愈來愈勁，撞啱前日係希斯堡慘劇廿二周年紀念，近十一年紀念日後賽事利物浦都不敗，戰意十足下有力搶分而回。