北倫敦打迎聖誕 兵工廠頭盤起刺
英超早場北倫敦打阿仙奴主場對熱刺預祝聖誕,兵工廠主場出擊已係「餐士面」,熱刺近績雖好,但防線傷兵同停賽問題嚴重,加上佢周中英聯盃出「夫添」,阿仙奴只用副選,今場點計都係阿仙奴贏面高,主W有1.45倍穩陣,阿古要埋「讓球主勝」。(now 632周六晚8時45分直播)
阿仙奴上輪聯賽擊退車路士,僅以一分優勢頂住來勢洶洶曼聯,雖然聯賽爭霸戰仲有排鍊,但先決條件係主場盡可能唔好失分,阿仙奴贏完車仔,當然要食住個勢再贏熱刺。兵工廠阿聯酋航空球場戰績可靠,聯賽加盃賽十四戰錄得十三勝一和,暫時只有曼聯能夠全身而退,兵工廠開出主W問題不大。
熱刺周中盃賽搏殘
今場另一有趣之處,就係兩隊周中同樣在英聯盃上陣,遭遇亦相似,都係作客兼一人被逐之下淘汰對手,不過對今晚戰局影響就有好大差距,阿仙奴係用副選球員踢盃仔,主力球員可專心備戰聯賽,即使十人應戰兼踢埋加時先至贏波,對球隊絲毫無損,熱刺就唔同,佢出夫添打破曼城主場長勝金身,全場搏到盡,體力消耗極巨。
咁都未算,熱刺本來已經鬧緊後荒,京治、加里夫巴利、伊高圖都要長期養傷,近期被迫以科特迪瓦中場索高拿串演中堅,點知索高拿英聯盃雙腳飛剷領紅牌,賽後上訴亦告失敗,今仗停賽,熱刺作客阿仙奴冇正宗中堅,更加守無可守。
阿仙奴同熱刺中前場組織力不相伯仲,不過阿古對兵工廠法比加斯、希比同路斯基呢個三人組合有強烈偏好,熱刺防線人腳不足,更利兵工廠發揮。 |